Cairo, Misri – Rais wa Shirikisho la Soka Afrika (CAF), Patrice Motsepe, amesema kuwa hakuna ulazima wa kuendelea kujadili kwa kina tukio lililotokea katika mechi ya fainali ya AFCON Final kati ya Senegal na Morocco.
Akizungumza na waandishi wa habari mjini Cairo, nchini Misri, Motsepe alieleza kuwa licha ya mpira wa miguu kuwa mchezo unaochochea hisia kubwa miongoni mwa mashabiki, suala hilo halipaswi kuendelea kupewa uzito mkubwa wa mijadala kwa sasa.
Alisisitiza kuwa tukio hilo tayari limefikishwa katika Mahakama ya Usuluhishi wa Michezo (CAS), ambayo ni chombo cha juu kabisa kinachoshughulikia migogoro ya michezo duniani.
“Tunachotaka kusisitiza ni kwamba suala hili liko mikononi mwa CAS, na sisi kama CAF tutaheshimu na kutekeleza uamuzi wowote utakaochukuliwa,” alisema Motsepe.
Aidha, aliongeza kuwa CAF haina mpango wa kuendelea kulijadili suala hilo hadharani kwa sasa. Badala yake, shirikisho hilo linaelekeza nguvu katika kuheshimu taratibu na mifumo ya kisheria ya michezo ili kuhakikisha haki inatendeka kwa pande zote zinazohusika.
Kauli hiyo inaashiria msimamo wa CAF wa kulinda misingi ya haki na uwazi katika usimamizi wa soka barani Afrika, huku likiacha vyombo husika vya kisheria kufanya maamuzi bila shinikizo la mijadala ya umma.
About the Author
