Msemaji wa Klabu ya Simba SC, Ahmed Ally, amezungumza kwa kina kuelekea mchezo wa mwisho wa hatua ya makundi ya Ligi ya Mabingwa Afrika Simba sc vs Stade Malien, akisisitiza kuwa licha ya Simba kutokuwa na nafasi ya kusonga mbele, ushindi ni wa lazima kwa ajili ya kurejesha heshima ya klabu na kuimarisha morali ya wachezaji pamoja na mashabiki.
Akizungumza na waandishi wa habari, Ahmed Ally amesema mchezo huo utachezwa saa 1:00 usiku katika Uwanja wa Benjamin Mkapa, akieleza kuwa hii ni kutokana na kanuni za Shirikisho la Mpira wa Miguu Afrika (CAF) zinazotaka mechi zote za mwisho za makundi kuchezwa kwa wakati mmoja.
“Mechi yetu dhidi ya Stade Malien itachezwa saa 1:00 usiku. Tumezoea kuchezwa saa 10 jioni lakini hii ni sheria ya CAF kwa mechi za mwisho za hatua ya makundi kuchezwa muda mmoja,” alisema Ahmed Ally.
Maandalizi Yaendelea, Kikosi Kimeingia Kambini
Ahmed Ally amebainisha kuwa maandalizi ya mchezo huo tayari yameanza mara baada ya Simba kumaliza mchezo dhidi ya KMC, ambapo kikosi kilirejea kambini kuanza maandalizi mapya.
“Baada ya mechi ya jana dhidi ya KMC, kikosi kilirejea kambini. Leo tunafanya mazoezi Mo Simba Arena na kesho tutafanya mazoezi Uwanja wa Benjamin Mkapa,” alifafanua.
Lengo ni Kusimika Heshima ya Mnyama
Akizungumzia umuhimu wa mchezo huo, Ahmed Ally amesema Simba inahitaji ushindi ili kusimika heshima ya klabu, hata kama matokeo ya mechi hiyo hayatabadili nafasi ya timu katika msimamo wa kundi.
“Hata kama hatuna tunapokwenda, mchezo huu ni muhimu sana. Tunataka kila Mwanasimba aone huu ni mchezo mkubwa. Tunakwenda kusimika heshima ya Mnyama,” alisema.
Ripoti ya Afya ya Wachezaji
Kuhusu hali ya wachezaji, Ahmed Ally ameeleza kuwa kikosi kiko vizuri kwa ujumla, isipokuwa Wilson Nangu ambaye anatarajiwa kusafiri kwenda Afrika Kusini kufanyiwa upasuaji wa kifundo cha mguu.
“Wilson Nangu tutampeleka Afrika Kusini kwa upasuaji mwishoni mwa wiki. Baada ya hapo tutajua atakuwa nje kwa muda gani. Kwa Yakubu Suleiman, maendeleo ni mazuri na anaweza kurejea kikosini muda wowote,” alisema.
Simba Kutafuta Ushindi wa Kwanza Mkapa Ligi Kuu
Ahmed Ally amekiri kuwa Simba haijapata ushindi wowote katika Uwanja wa Benjamin Mkapa kwenye Ligi Kuu msimu huu, jambo lililosababisha kupotea kwa imani kwa mashabiki. Hata hivyo, amesema mchezo huu ni fursa ya kurejesha heshima na kujiamini.
“Tunataka kufuta dhana kwamba hatuwezi kushinda Mkapa. Mkapa ni nyumbani kwetu. Lengo ni kurejesha imani kwa wachezaji na mashabiki,” alisema.
Simba Haitaki Kupoteza Mara Mbili kwa Mpinzani Mmoja
Kwa mujibu wa Ahmed Ally, falsafa ya Simba ni kutoruhusu kupoteza mara mbili mfululizo dhidi ya mpinzani mmoja, akitoa mfano wa mechi zilizopita dhidi ya Al Ahly na Petro de Luanda.
“Hatupo tayari kupoteza mara mbili kwa mpinzani mmoja. Kama ilivyokuwa kwa Petro, ndivyo itakavyokuwa kwa hawa. Simba lazima irudishe heshima yake,” alisisitiza.
Wito Kwa Mashabiki Kujitokeza Kwa Wingi
Ahmed Ally amewataka mashabiki wa Simba kujitokeza kwa wingi Uwanja wa Benjamin Mkapa tarehe 14, akisema ushindi wa mchezo huo utasaidia kurejesha kujiamini kuelekea mechi za Ligi Kuu na Kombe la Shirikisho.
“Hakuna Mwanasimba anatakiwa kubaki nyumbani. Hata kama hatuendi mahali, ushindi ni muhimu kwa morali na kujiamini,” alisema.
Viingilio vya Mchezo
Ahmed Ally ametangaza viingilio vya mchezo huo kuwa kama ifuatavyo:
- Mzunguko: Tsh 3,000
- VIP C: Tsh 5,000
- VIP B: Tsh 10,000
- VIP A: Tsh 20,000
- Platinum: Tsh 100,000
Ujio wa Stade Malien na Waamuzi
Stade Malien wanatarajiwa kuwasili nchini tarehe 13 alfajiri na kufanya mazoezi katika Uwanja wa Benjamin Mkapa siku hiyo. Waamuzi wa mchezo huo wote wanatoka Malawi na wataanza kuwasili nchini kuanzia kesho.
Hitimisho
Mchezo wa Simba dhidi ya Stade Malien unatarajiwa kuwa na ushindani mkubwa, huku Mnyama akisaka ushindi wa heshima mbele ya mashabiki wake. Huu ni mchezo wa kurejesha imani, heshima, na kujiamini kuelekea michezo ijayo.
About the Author
